निष्पक्ष र विश्वसनीय खबरको सँगालो 
Khabar Punja
२७ पुष २०८१, आईतवार
दुलेगौँडा । यहाँको एक वडाले ज्येष्ठ नागरिकलाई पानी तताउने इलेक्ट्रिक जग उपहार दिएको छ । ७५ वर्ष उमेर पुगेका ज्येष्ठ नागरिकको सम्मानमा शुक्लागण्डकी नगरपालिका– ७ को कार्यालयले पानी तताउने इलेक्ट्रिक जग उपहार दिएको हो ।
वडाका १३५ जनालाई सम्मान स्वरुप उपहार दिएको वडाध्यक्ष रामबहादुर क्षेत्री थापाले बताए । वडाले हरेक बर्ष ज्येष्ठ नागरिकलाई सम्मान गर्ने गरेकोमा यसपाली चिसोबाट बच्न तातोपानी तताउने इलेक्ट्रिक जग उपहार दिएको उनले बताए ।
‘चिसोको समय छ । चिसोबाट जोगिनलाई बेलाबेलामा तातोपानी पिउनलाई तताउने इलेक्ट्रिक जग दिएका हौँ’, उनले भने । टोलटोलमा गएर बाँडिएको उनको भनाई छ । गत बर्ष वडाले झुल बाँडेको थियो । ज्येष्ठ नागरिकको सम्मान गर्दै वडाले सुरुको बर्ष हर्लिक्स र नगद उपहार दिएको थियो । दोस्रो बर्ष कम्मल बाँडेको थियो । इलेक्ट्रिक जग बाँड्न वडाले चालु आर्थिक बर्षमा एक लाख रुपैयाँ बजेट विनियोजन गरेको थियो ।
