निष्पक्ष र विश्वसनीय खबरको सँगालो 
Khabar Punja
७ मंसिर २०८१, शनिबार
तनहुँ/तनहुँको भानु नगरपालिका–९ सिमलगैह्रामा सोमबार पहिराले घर पुरिँदा हजुरआमा र नातिनीको मृत्यु भएको छ । मृत्यु हुनेमा ८० वर्षीया तिलमाया धौराली र १५ वर्षीय शिताष्मा धौराली रहेको जिल्ला प्रहरी कार्यालय तनहुँले जनाएको छ ।
स्थानीय मनोज धौलारीको घर पहिराले बगाउँदा दुई जना बेपत्ता भएका थिए । बेपत्तामध्ये शिताष्माको उद्धार गरिएपनि अस्पताल लैजाने क्रममा बाटोमा निधन भएको जिल्ला प्रहरी कार्यालय तनहुँका प्रहरी नायब उपरिक्षक युवराज तिमिल्सिनाले जानकारी दिए । तिलमायाको भने घटनास्थलमै शव निकालिएको छ ।
पहिराले पुरिएर तनहुँमा एकसाताको अवधिमा १३ जनाको मृत्यु भएको छ भने एक जना अझै बेपत्ता छन् । तनहुँको व्यास नगरपालिकामा पाँच, ऋषिङ गाउँपालिकामा पाँच र म्याग्दे गाउँपालिकामा एक जनाको मृत्यु भएको थियो । व्यास नगरपालिकाका एक जना भने अझै बेपत्ता रहेको प्रहरीले जनाएको छ ।
