निष्पक्ष र विश्वसनीय खबरको सँगालो 
Khabar Punja
९ जेष्ठ २०८१, बुधबार
तनहुँ । गण्डकी प्रदेश सरकारले किसानको वर्गीकरणको तयारी शुरु गरेको छ । कृषि क्षेत्रको विकास र वास्तविक किसानलाई प्रोत्साहन गर्ने उद्देश्य सहित गण्डकी प्रदेश सरकारले किसानको वर्गीकरण गर्न लागेको हो ।
तनहुँको बन्दीपुर गाउँपालिका–५ स्थित याम्पा दुग्ध उत्पादक कृषि सहकारी संस्थाका कृषकलाई अनुदान वितरण गर्न शनिबार आयोजित कार्यक्रममा प्रदेश सरकारका भूमि, व्यवस्था, कृषि तथा सहकारीमन्त्री लेखबहादुर थापाले कृषि पेशामा आबद्ध रहँदै आएका किसानको वर्गीकरणका लागि प्रदेश सरकारले काम शुरु गर्न लागेको जानकारी दिनुभयो ।
भूमि नभएका श्रमजीवि किसान, साना किसान, मध्यम किसान, ठूला किसान र उद्यमी किसानलाई छुट्टाछुट्टै रुपमा वर्गीकरण गरिने मन्त्री थापाले जानकारी दिनुभयो । “रु चार÷लाख लगानी गर्न सक्नेलाई साना किसान, रु दश लाखसम्म लगानी गर्न सक्नेलाई मध्यम किसान, रु ५० लाखसम्म लगानी गर्न सक्नेलाई ठूला किसान र सो भन्दा बढी लगानी गरी रोजगारी दिन सक्नेलाई उद्यमी किसानको रुपमा वर्गीकरण गर्छौ,” मन्त्री थापाले भन्नुभयो ।
प्रदेश सरकारले कृषकलाई केन्द्रमा राखेर कार्यक्रम बनाएकाले कृषि क्षेत्रमा लगानीको अभाव नहुने मन्त्री थापाले बताउनुभयो । “किसानलाई अब लगानीको अभाव हुन्न, कृषकलाई अनुदान, सरल व्याजमा ऋण प्रवाह गर्नका लागि प्रदेश सरकार प्रतिबद्ध छ, हरेक बैङ्कले पनि १५ प्रतिशत अनिवार्य लगानी कृषि क्षेत्रमा गर्नुपर्ने प्रावधान छ,” उहाँले भन्नुभयो ।
शिक्षित व्यक्तिहरु पनि कृषि पेशामा आउनु खुशीको कुरा भएको बताउँदै मन्त्री थापाले कृषि क्षेत्रमा सम्भावना रहेको उल्लेख गर्नुभयो । कृषिमा उत्पादन वृद्धि गरी लागत घटाउन सरकारले सहयोग गर्ने मन्त्री थापाले प्रतिबद्धता जनाउनुभयो । कोभिड–१९ बाट रोजगारी गुमाएकालाई कृषिमा रोजगारी दिन प्रदेश सरकारले रु १८ करोड बजेट विनियोजन गरेको मन्त्री थापाले जानकारी दिनुभयो ।
बन्दीपुर गाउँपालिकाका अध्यक्ष पूर्णसिं थापाले दूधमा अनुदान दिने व्यवस्थाले पशुपालनमा कृषकको आकर्षण बढेकाले उक्त कार्यक्रमलाई चालु आर्थिक वर्षमा पनि निरन्तरता दिइएको बताउनुभयो । दूधमा अनुदान वितरण गर्नका लागि गाउँपालिकाले गत आर्थिक वर्षमा रु १५ लाख बजेट विनियोजन गरेको थियो भने उक्त कार्यक्रमलाई यस वर्ष पनि निरन्तरता दिइएको थापाले जानकारी दिनुभयो ।
याम्पा दुग्ध उत्पादक कृषि सहकारी संस्थाका अध्यक्ष छविलाल घिमिरेले सहकारीमा दूध विक्री गर्ने कृषकलाई रु १० लाख २९ हजार वितरण गरिएको जानकारी दिनुभयो । उक्त सहकारीमा एक सय १५ शेयर सदस्य र १५ गैह्र सदस्यले दैनिक दूध विक्री गर्ने गरेका छन् । गत वर्ष दैनिक चार हजार दुई सय लिटर दूध सङ्कलन हुने गरेकामा यो वर्ष दैनिक तीन हजार छ सय लिटर दूध मात्रै सङ्कलन भएको थियो ।
गाउँपालिकाले यस अगाडी बन्दीपुर गाउँपालिका–१ स्थित सूर्योदय दूग्ध उत्पादक सहकारीमा आबद्ध कृषकलाई रु एक लाख १७ हजार पाँच सय वितरण गरेको थियो ।
