Khabar Punja

तनहुँ : तनहुँको शुक्लागण्डकी नगरपालिका–८ स्थित एक्लेडाँडामा बुद्धको मूर्ति सहित पर्यटकीय पूर्वाधार निर्माण गरिने भएको छ । धार्मिक पर्यटकीय गन्तव्य बनाउने उद्देश्य सहित उक्त ठाउँमा बुद्धको मूर्ति र अन्य पर्यटकीय पूर्वाधार निर्माण गर्न लागिएको हो ।

वडा कार्यालयले गौरवको योजनाको रुपमा सूचीकृत गरेको उक्त ठाउँमा पूर्वाधार निर्माणका लागि डिपिआर तयार भइसकेको वडाध्यक्ष कृष्णप्रसाद रेग्मीले जानकारी दिनुभयो । उहाँका अनुसार वडा कार्यालयको रु पाँच लाखको बजेटमा बन्दाबन्दीकै अवधिमा जिओ इन्जिनियरिङ कन्स्लटेन्सीले डिपिआर निर्माण गरेको छ । एक्लेडाँडामा बुद्धको मूर्ति निर्माणका लागि माटो परीक्षण कार्य समेत सम्पन्न भइसकेको छ ।

“सम्भावना बोकेर पनि ओझेलमा परेको यस ठाउँलाई उजागर गर्ने उद्देश्य सहित पर्यटकीय गन्तव्य बनाउन खोजेका हौ,” रेग्मीले भन्नुभयो, “चालु आर्थिक वर्षमै यस ठाउँमा पूर्वाधार निर्माणका काम शुरु हुन्छ ।” चालु आर्थिक वर्षमा नगरपालिकाले यसका लागि रु दश लाख बजेट विनियोजन गरेको छ । उक्त बजेटबाट बाटो निर्माण, सिढी र रेलिङ निर्माणका काम शुरु गरिनेछ ।

डिपिआर अनुसार बुद्धको मूर्ति सहित अन्य पूर्वाधार निर्माणका लागि करीब रु तीन करोड बजेट अनुमान गरिएको छ । तिब्बतीयन क्याम्प नजिकै भएकाले डाँडामा बुद्धको मूर्ति निर्माण गरिने र पूजाआजाको व्यवस्था पनि मिलाइनेछ । त्यस्तै उक्त ठाउँमा अष्टवाराहीको मूर्ति पनि निर्माण गर्ने प्रस्ताव छ ।

वडाध्यक्ष रेग्मीका अनुसार यस ठाउँमा पार्क, बनभोज स्थल लगायतका अन्य पूर्वाधार निर्माण गर्ने योजना छ ।